Nuusbrief 2018|01

“Ek het jou seun.”

Hallo, en welkom by my nuusbrief.

Eers moet ek om verskoning vra dat ek so lank stil was en tweedens dat hierdie nuusbrief nou eers arriveer. Ek het my webwerf heeltemal herontwerp en dit het heelwat langer geneem as wat ek gehoop het. Maar dis nou opgelaai. Gaan maak gerus ’n draai daar—klik net op my naam heel bo—en laat weet my wat jy dink. Dit lyk nie net anders nie, die meeste van die inhoud is ook nuut.

“Ek het jou seun. Moenie die polisie bel nie. As julle alles doen wat ek sê, sal ek hom nie seermaak nie. Ek sal weer bel.”

My nuwe boek se titel is Losprys en dit sal binnekort in boekwinkels begin vervuil.

Adjudant Enzo Ariefdien verkies moorde. Dooie slagoffers. Hy wil nie ’n vermiste lewe in sy hande vashou nie, nog minder ’n kind s’n. Maar dis presies wat hy kry en dis boonop ’n ontvoering vir ’n losprys. ’n Hoëprofielsaak met die desperate Amerikaanse ouers aan die een kant en die ambisieuse kaptein Lubambo aan die ander. En almal wil resultate hê.

Intussen trek die onderhandelingspan by die gesin se huis in Llandudno in, adjudant Karla Blanckenberg in die rol van primêre onderhandelaar. Uitgelewer aan die ontvoerders se skedule om kontak te maak—en te verbreek—kan sy net wag en dis dan wanneer die handjie met die rooi gaatjie haar bly teister.

Die ontvoerders het duidelik die gesin se roetine geken. Maar is die gesin van buite dopgehou? Of van binne? En hoekom klink dit asof daar iets meer persoonliks agter die ontvoering skuil?

Losprys kom vroeg in Oktober uit. Daar gaan drie bekendstellings in die Kaap wees:

10 Oktober 2018, 18:00. Brackenfell-biblioteek.
16 Oktober 2018, 18:00. Bellville-biblioteek, saam met James-Brent Styan (Steinhoff en die Stellenbosse Boys).
25 Oktober 2018, 18:00. Bargain Books Willowbridge.

As jy in die Kaap is, kom kuier asseblief saam. Daar is meer inligting op my webwerf. Ons werk ook aan ’n toer Pretoria toe in November.

Dankie dat jy gelees het.

m.s.