Nuusbrief 2018|04

Mitchells Plain-koffie

Hallo, en welkom by my nuusbrief.

Losprys is NOU BESKIKBAAR by boekwinkels landwyd en om dit te vier is daar ’n KOMPETISIE.

“Ek kan nie regtig gaan nie, ek is die enigste barista. Dis hoekom ek hier is.” Kyle Gordon kyk by hulle verby. “Nie dat daar veel sin daaraan is om by die huis rond te sit en mal te raak nie.” Hy sug. “Kan ek vir julle koffie aanbied? Miskien ons Black Bullet? Dis al wat my nog op my voete hou.”

“Wat is ’n Black Bullet?” Ariefdien skuif op die kroegstoel by die toonbank in en Zaphalala volg sy voorbeeld.

“Espresso met klapperolie en botter.”

Ariefdien lig sy een wenkbrou. “Watse goed?”

“Dit gee jou ’n energie-inspuiting. En klapperolie is geweldig gesond. Ons gebruik net organiese virgin cold pressed klapperolie. Of anders ’n flat white?”

“Ek is eintlik maar gewoond aan Mitchells Plain-koffie.”

Kyle Gordon trek sy gesig. “Daai goed is nie koffie nie, man. Dis ’n mismaaksel van sigorei met net genoeg koffiekorrels by dat hulle daarmee kan wegkom om dit ‘koffie’ te noem.”

Kyle Gordon is die ontvoerde seun se ouer broer. Hy het ’n koffiewinkel in die Mainstream-kompleks in Houtbaai met die naam This is Coffee. (Anderkant die bruggie, regs by die skeepsromp van die Albatross, vir dié wat Houtbaai ken.)

So ek het hierdie stel van vier koffiebekers wat ’n huis soek. Hulle name is Mags, Menck, Claire en Enzo. Hulle kan ’n handvol wees, maar uiteindelik is dit ’n kwessie van wat jy insit, sal jy uitkry.

Die stappe vir die LOSPRYS-KOMPETISIE is as volg:

Koop Losprys by jou gunsteling boekwinkel. As daardie boekwinkel met nulle en ene gebou is, is daar heel moontlik ’n skakel op my webwerf. As jy boekwinkels van baksteen en sement verkies, volg net die oranje gloed.
Neem ’n foto van Losprys—op ’n interessante plek, saam met interessante elemente, of op enige interessante manier. Ek gebruik opsetlik die generiese “interessante”, want ek wil sien waarmee jý vorendag kom.*
Plaas dit op Facebook, Twitter en/of Instagram, en BAIE, BAIE BELANGRIK, tag my (“@MartinSteynAuthor” op Facebook, “@martin0steyn”—dis ’n nul in die middel—op Twitter en Instagram) en voeg #LOSPRYS by. Want anders gaan ek dit nie sien nie en dan kan dit nie ingeskryf word nie.
Jy is welkom om meer as een foto te plaas—elkeen sal in aanmerking kom solank dit getag is. Jy is ook welkom om meer as een sosialemediaplatform te gebruik.
Die kompetisie eindig op 21 November 2018.
Ek sal so gou moontlik die wenner bekend maak en reël dat jy jou stel koffiebekers kry.
Enigeen kan deelneem, maar ongelukkig kan ek net na ’n adres binne Suid-Afrika versend.
*Moet nou net nie só interessant raak dat daar moeilikheid kom nie.

Hier is al die datums vir die Losprys-boektoer. Details is op my webwerf. Kom kuier asseblief saam.

Dankie dat jy gelees het.

m.s.